ഭഗവതി പടിയിറങ്ങുമ്പോൾ

പിച്ച വച്ചപ്പോഴേ പഠിച്ചതാണ് 

കൈ കൂപ്പുവാന് - 

എല്ലാം അമ്പോറ്റി തരുമെന്ന് !

അച്ഛനേം അമ്മയേം കുഞ്ഞിനേം 

അടുത്ത വീട്ടിലെ കുട്ടനേം 

കാത്തോളുമെന്നും .

സന്ധ്യക്ക് വച്ച വിളക്ക് 

മുത്തശ്ശി മടിയിൽ നാമജപം 

സങ്കടങ്ങൾ തീർപ്പാക്കുമെന്ന് !

പിന്നീടങ്ങോട്ട്  -

പെണ്ണുങ്ങൾ വിളക്ക് വയ്ക്കണമെന്ന് .

പെണ്ണുങ്ങൾ വിളക്ക് തേക്കണമെന്ന് !

ദൈവത്തോട് അടുക്കുകയല്ലേ ,

കാര്യം പറയാനൊരാളായല്ലോ ..

..തല്ലു കൊള്ളിക്കരുതേ 

ചീത്ത കേൾപ്പിക്കരുതേ 

പരീക്ഷയിൽ ജയിപ്പിക്കണേ 

പഠിപ്പിച്ചു വലിയ ആളാക്കണേ ..

ചുവന്ന കണ്ണുള്ള ആളെ ഭയന്നോടി,

രക്ഷിക്കണേ എന്നലറുമ്പോൾ ,

കാത്തോളണേ ദൈവേ! എന്നും കൂടി  ..

തിങ്ങി നിറഞ്ഞ ശകടത്തിൽ 

തൂങ്ങിയാടുന്ന നിസ്സഹായതയിൽ 

അധിനിവേശങ്ങളെ ഭയന്ന് 

ദേഹം ചുരുണ്ടൊളിക്കുമ്പോൾ 

കാത്തോളണേ എന്ന് നെഞ്ചിടിപ്പ്  !

എന്തും പറയാനൊരാൾ ..!

അറിയാതെത്തിയ ചോരപ്പാടിൽ 

ഭയന്ന് വിളറിയ നിൽപ്പിൽ ,

"നീ പെണ്ണായെന്ന്‌ ;"

സൂക്ഷിക്കണമെന്നും! 

ആരെയെന്നറിയാതമ്പരന്ന്  ..

എന്തായാലെന്ത്- 

കാത്തോളുമല്ലോ  ..

കച്ചവടമുറപ്പിച്ച്‌ 

അയാളുടെ വീട്ടുകാർ 

പടിയിറങ്ങുമ്പോൾ ,

പഠിച്ചാളാവാനാവില്ലെന്നു  

വിതുമ്പുമ്പോൾ ,

രക്ഷിക്കണേ എന്നാർത്തു 

നടയിൽ വീഴുമ്പോൾ  

ആശിച്ചു കൈവിടില്ലെന്ന് ..

ഭാരമൊഴിപ്പിച്ച് കുടിയിറക്കി വീട്ടുകാർ !

ദൈവാധീനമാണെന്ന് നാട്ടുകാർ !

വലതുകാൽ വച്ച് കയറണമെന്ന് ..

ഭഗവതിയാണത്രെ -

കുടിയിരുത്താൻ !

-- ദൈവത്തോടടുത്ത്  ..

കച്ചവടത്തിലെ കണക്കുപിശകിൽ 

പിന്നത് മൂധേവിയായതും  ;

വിലവീണ്ടും പേശിയതും ..

സിരകളെ പുണർന്ന് പാഞ്ഞ 

വേദനയിൽ 

അനാഥയായി 

ആരുമില്ലാത്തിടത്ത് ,

അലറി !ദൈവമേ എന്ന് !..

ഇടങ്ങളിൽ നിന്ന് 

കുടിയിറക്കിയവരെ തിരഞ്ഞലഞ്ഞ്

ഒടുവിൽ ..

  

"നീ പെണ്ണാണെന്ന് -

നിനക്ക് അശുദ്ധി എന്ന് -

കുത്തിവച്ചത് ,

നിന്നെ വിറ്റത് ,

നിന്നെ വാങ്ങിയത് ,

ശാപവാക്കുകൾ കൂരമ്പായെറിഞ്ഞത് ,

കവിളിൽ തിണർത്ത പാടേകിയത് ,

കാൽക്കീഴിൽ ഞെരിച്ചമർത്തിയത് ,

സഹനം ഭൂഷണമെന്ന് പറഞ്ഞ്  

മുഖം തിരിച്ചത് ,

ആരുമല്ലാതാക്കിയത് ,

ആരുമില്ലാതാക്കിയത് .."

ഒന്ന് പോലും 

ദൈവമല്ലെന്ന 

ഉൾവിളിയിൽ 

ഭഗവതി പടിയിറങ്ങി ..

മനുഷ്യനെ തിരഞ്ഞ് ..

 -published in 2018