Friday, September 24, 2010

രണ്ട് കാലുകള്‍.

അവ ഓടുകയായിരുന്നു ; രണ്ട് കാലുകള്‍ ..
കല്ലും മുള്ളും കുണ്ടും കുഴിയും താണ്ടി ,
ഒരേ വേഗത്തില്‍, നഗ്നരായി..

മുറിപ്പാടുകള്‍ തഴമ്പുകളായി ..
കാലുകള്‍ വേദന  അറിയാതെയും .
 വെയില്‍  മൂത്തെന്നും  ചൂടേറിയെന്നും 
മഴയുറച്ചെന്നും  തണുപ്പരിച്ചെന്നുമൊക്കെ  
ശരീരം  പരാതിപ്പെടുന്നുണ്ടായിരുന്നു
പക്ഷെ ...
കാലുകള്‍ ;അവ നിര്‍ദയരായി  നീങ്ങി ,
വെയില്‍  മാഞ്ഞിറങ്ങിയ  സന്ധ്യയിലേക്കും ,
പിന്നെ  ഇരുട്ടിലേക്കും ..
അടുത്ത  പ്രഭാതത്തില്‍ ,
അതേ  വേഗത്തില്‍,
പുറത്തേക്കും.
ഉറക്കം  തൂങ്ങുന്ന  ശരീരവും  ചുമന്നു ..
...
ആദ്യം  അടര്‍ന്നു  വീണത്
കാലുകള്‍ക്ക്  ഒട്ടും  വേണ്ടാത്ത  തല  ആയിരുന്നു
പിന്നെയും  ഓരോരോ  ഭാഗങ്ങള്‍ ..
ഒടുവില്‍ ..
കാലുകള്‍ .. തനിച്ചായി ..
എന്നിട്ടും  അവ ഓടിക്കൊണ്ടേയിരുന്നു ...